ഇന്ത്യയിൽ ജനനനിരക്ക് കുറഞ്ഞു; മരണനിരക്കിൽ നേരിയ വർധന

---

ന്യൂഡൽഹി: ഇന്ത്യയിൽ 2023-ലെ ജനനങ്ങളുടെ എണ്ണം മുൻവർഷത്തേക്കാൾ കുറഞ്ഞു. അതേസമയം, മരണങ്ങളുടെ എണ്ണത്തിൽ നേരിയ വർധനവ് രേഖപ്പെടുത്തി. 2023-ൽ 2.52 കോടി ജനനങ്ങളാണ് രാജ്യത്ത് രജിസ്റ്റർ ചെയ്തത്. 2022-ലേതിനേക്കാൾ ഇത് 2.32 ലക്ഷം കുറവാണെന്ന് രജിസ്ട്രാർ ജനറൽ ഓഫ് ഇന്ത്യ (RGI) സമാഹരിച്ച സിവിൽ രജിസ്‌ട്രേഷൻ സിസ്റ്റം (CRS) റിപ്പോർട്ട് വ്യക്തമാക്കുന്നു.

മരണനിരക്ക്

• 2023-ൽ 86.6 ലക്ഷം മരണങ്ങളാണ് രാജ്യത്ത് രജിസ്റ്റർ ചെയ്തത്. 2022-ലെ 86.5 ലക്ഷം മരണങ്ങളെ അപേക്ഷിച്ച് ഇത് നേരിയ വർധനവാണ്.
• റിപ്പോർട്ട് പ്രകാരം, 2022-ലും 2023-ലും മരണനിരക്കിൽ വലിയ വർധനവ് ഉണ്ടായിട്ടില്ല. കോവിഡ്-19 കാരണം മരിച്ചവരുടെ എണ്ണം 5,33,665 ആയി ആരോഗ്യ മന്ത്രാലയം രേഖപ്പെടുത്തിയിട്ടും മരണനിരക്കിൽ വലിയ വ്യതിയാനം ഉണ്ടായില്ലെന്നത് ശ്രദ്ധേയമാണ്.
• എങ്കിലും 2021-ൽ മരണനിരക്കിൽ ഗണ്യമായ വർധന രേഖപ്പെടുത്തിയിരുന്നു. കോവിഡ്-19 ലോക്ക്ഡൗണിന്റെ രണ്ടാം വർഷമായ 2021-ൽ 102.2 ലക്ഷം മരണങ്ങളാണ് രജിസ്റ്റർ ചെയ്തത്. 2020-ൽ ഇത് 81.2 ലക്ഷമായിരുന്നു.

കുറഞ്ഞ ശിശു ലിംഗാനുപാതം

ആയിരം ആൺകുട്ടികൾക്ക് എത്ര പെൺകുട്ടികൾ ജനിക്കുന്നു എന്നതിനെ സൂചിപ്പിക്കുന്ന ശിശു ലിംഗാനുപാതത്തിൽ (Sex Ratio at Birth) ഏറ്റവും കുറവ് രേഖപ്പെടുത്തിയത് ഝാർഖണ്ഡാണ് (899).

• ഝാർഖണ്ഡിന് പിന്നിൽ ബിഹാർ (900), തെലങ്കാന (906), മഹാരാഷ്ട്ര (909), ഗുജറാത്ത് (910), ഹരിയാന (911), മിസോറം (911) എന്നീ സംസ്ഥാനങ്ങളാണുള്ളത്.
• 2020 മുതൽ ബിഹാർ ആണ് ഏറ്റവും കുറഞ്ഞ ശിശു ലിംഗാനുപാതം രേഖപ്പെടുത്തുന്നത്.

മികച്ച ശിശു ലിംഗാനുപാതം

• ഏറ്റവും മികച്ച ശിശു ലിംഗാനുപാതം രേഖപ്പെടുത്തിയത് അരുണാചൽ പ്രദേശാണ് (1,085).
• തുടർന്ന് നാഗാലാൻഡ് (1,007), ഗോവ (973), ലഡാക്ക് (972), ത്രിപുര (972), കേരളം (967) എന്നിവയും മികച്ച നിലവാരം പുലർത്തി.

സ്ഥാപനപരമായ ജനനങ്ങൾ

2023-ൽ രജിസ്റ്റർ ചെയ്ത മൊത്തം ജനനങ്ങളിൽ 74.7 ശതമാനവും ആശുപത്രികൾ പോലുള്ള സ്ഥാപനങ്ങളിൽ വെച്ചുണ്ടായവയാണ്. സിക്കിമിനെക്കുറിച്ചുള്ള വിവരങ്ങൾ റിപ്പോർട്ടിൽ ഉൾപ്പെടുത്തിയിട്ടില്ല. 2023-ലെ മൊത്തം ജനന രജിസ്‌ട്രേഷൻ 98.4 ശതമാനമാണ്.

സമയബന്ധിതമായ രജിസ്‌ട്രേഷൻ

നിശ്ചിത സമയപരിധിയായ 21 ദിവസത്തിനുള്ളിൽ 90 ശതമാനത്തിലധികം ജനന രജിസ്‌ട്രേഷൻ കൈവരിച്ച 11 സംസ്ഥാനങ്ങളും കേന്ദ്ര ഭരണ പ്രദേശങ്ങളുമുണ്ട്. ഗുജറാത്ത്, പുതുച്ചേരി, ചണ്ഡീഗഢ്, ദാദ്ര & നഗർ ഹവേലി & ദമൻ & ദിയു, തമിഴ്‌നാട്, ലക്ഷദ്വീപ്, ആൻഡമാൻ & നിക്കോബാർ ദ്വീപുകൾ, ഹരിയാന, ഹിമാചൽ പ്രദേശ്, ഗോവ, പഞ്ചാബ് എന്നിവയാണവ.

• ഒഡീഷ, മിസോറം, മഹാരാഷ്ട്ര, ഛത്തീസ്ഗഢ്, ആന്ധ്രാപ്രദേശ് എന്നീ അഞ്ച് സംസ്ഥാനങ്ങൾ 80-90% രജിസ്‌ട്രേഷൻ റിപ്പോർട്ട് ചെയ്തു.
• കേരളം ഉൾപ്പെടെ 14 സംസ്ഥാനങ്ങളിൽ 50-80% ആണ് രജിസ്‌ട്രേഷൻ.