3–4 minutes
കളമശേരി: ഈ മാസം ആദ്യവാരം മുതല്‍ വടക്കന്‍, മധ്യ കേരളതീരങ്ങളില്‍ ഉപരിതല കടല്‍ജലത്തിന്റെ റെഡ്‌ ടൈഡ്‌ പ്രതിഭാസം നോക്‌റ്റിലൂക്ക സിന്‍റ്റിലാന്‍സ്‌ എന്ന ഡൈനോ ഫ്‌ലാജെലേറ്റ്‌ മൈക്രോ ആല്‍ഗയുടെ ചുവന്ന വകഭേദത്തിന്റെ വന്‍തോതിലുള്ള വ്യാപനത്തിന്‌ കാരണമാകും.
കൊച്ചി ശാസ്‌ത്ര സാങ്കേതിക സര്‍വകലാശാലയിലെ മറൈന്‍ ബയോളജി, മൈക്രോ ബയോളജി, ബയോകെമിസ്‌ട്രി വിഭാഗം ഗവേഷകരാണ്‌ ഇതു കണ്ടെത്തിയത്‌. ഹാനികരമായ ആല്‍ഗല്‍ ബ്ലൂമുകളില്‍ കാലാവസ്ഥാ സ്വാധീനം പഠിക്കുന്ന എ.എന്‍.ആര്‍.എഫ്‌ -എസ്.ആര്‍.ജി പ്രോഗ്രാമിന്റെ കീഴിലുള്ള ഗവേഷണ സംഘം, വകുപ്പിലെ അസിസ്‌റ്റന്റ്‌ പ്ര?ഫസര്‍ ഡോ.ലതിക സിസിലി തോമസിന്റെ നേതൃത്വത്തില്‍ തൃശൂര്‍ ജില്ലയിലെ ചാവക്കാട്‌ ബീച്ചില്‍ നിന്നും കോഴിക്കോട്‌ ജില്ലയിലെ ഒന്നിലധികം ബീച്ചുകളിലും നിന്നും നടത്തിയ നിരീക്ഷണങ്ങളെത്തുടര്‍ന്നാണ്‌ ആല്‍ഗല്‍ ബ്ലൂമുകള്‍ സ്‌ഥിരീകരിച്ചത്‌. നിലവിലുള്ള ഉപരിതല പ്രവാഹങ്ങളുടെ സ്വാധീനത്താല്‍, ആല്‍ഗല്‍ ബ്ലൂം ക്രമേണ തെക്കോട്ട്‌ വ്യാപിച്ചു. കൂടാതെ എടക്കഴിയൂരിനെയും പുത്തന്‍കടപ്പുറം തീരപ്രദേശങ്ങളെയും ഇതു ബാധിച്ചു. പ്രാദേശികമായി പൂനീര്‍, പോളവെള്ളം അല്ലെങ്കില്‍ കര വെള്ളം എന്ന് മലയാളത്തില്‍ അറിയപ്പെടുന്ന ഈ പ്രതിഭാസം നിരവധി കിലോമീറ്ററില്‍ തീരപ്രദേശങ്ങളില്‍ വ്യാപിച്ചിട്ടുണ്ട്‌. ആഴം കുറഞ്ഞ ഇന്റര്‍ടൈഡല്‍ സോണുകളില്‍ ചുവപ്പ്‌ നിറം ഏറ്റവും പ്രകടമാണ്‌, രാത്രിയില്‍ കടല്‍ തീരത്ത്‌ അതിശയകരമായ നീല-പച്ച ബയോലുമിനിസെന്‍സും ഒപ്പമുണ്ട്‌. നോക്‌റ്റിലൂക്ക സിന്‍റ്റിലാന്‍സ്‌ രണ്ട് രൂപങ്ങളിലാണ്‌ കാണപ്പെടുന്നത്‌ – ഗ്രീന്‍ ടൈഡുകള്‍ക്ക്‌ കാരണമാകുന്ന ഫോട്ടോസിന്തെറ്റിക്‌ എന്‍ഡോസിംബിയന്‍റ്റുകളുള്ള പച്ച വകഭേദവും, പ്രധാനമായും ഡയാറ്റങ്ങളെ ഭക്ഷിക്കുന്ന റെഡ്‌ ടൈഡുകള്‍ ഉണ്ടാക്കുന്ന ചുവന്ന ഹെറ്ററോട്രോഫിക്‌ വാകഭേദവും, കേരളത്തിന്റെ തീരദേശ ജലാശയങ്ങളില്‍ പലപ്പോഴും മഴക്കാലത്ത്‌ രണ്ട് വകഭേദങ്ങളും കാണപ്പെടുന്നുണ്ട്‌.
രണ്ട് പതിറ്റാണ്ടിലേറെയായി കുസാറ്റ്‌ മറൈന്‍ ബയോളജി, മൈക്രോബയോളജി, ബയോകെമിസ്‌ട്രി വിഭാഗം ഹാനികരമായ ആല്‍ഗല്‍ ബ്ലൂമുകളെ തുടര്‍ന്ന്‌ ഓക്‌സിജന്‍ കുറയുന്നത്‌, ജലജീവികളില്‍ അതിന്റെ സ്വാധീനവും അവയുടെ പരിസ്‌ഥിതിക ആഘാതങ്ങള്‍, നോക്‌റ്റിലൂക്കയുടെ ജീവിതചക്രം, ഭക്ഷണ പരിസ്‌ഥിതിയും ജെല്ലിഫിഷ്‌ ബ്ലൂമുകളുമായുള്ള ബന്ധം, തീരദേശ ഭക്ഷ്യവലയങ്ങളിലെ ഫലങ്ങള്‍ എന്നിവയെക്കുറിച്ചുള്ള പഠനങ്ങള്‍ പ്രസിദ്ധീകരിച്ചിട്ടുണ്ട്‌. നോക്‌റ്റിലൂക്കയുടെ വലിപ്പവും ഇടതൂര്‍ന്ന അഗ്രഗേഷനുകളും കാരണം, ആല്‍ഗല്‍ ബ്ലൂമിന്‌ ജലാശയത്തില്‍ നിന്ന് ഓക്‌സിജനെ വേഗത്തില്‍ ഇല്ലാതാകാന്‍ കഴിയും. കാലാവസ്‌ഥ വ്യതിയാനം, സമുദ്രോപരിതല താപനിലയിലെ വര്‍ധനവ്‌, ജല മലിനീകരണം എന്നിവ കേരളം തീരത്ത്‌ ഇത്തരം പ്രതിഭാസത്തിന്റെ ആവര്‍ത്തനം വര്‍ധിപ്പിക്കുമെന്ന്‌ വിദഗ്‌ദ്ധര്‍ മുന്നറിയിപ്പ്‌ നല്‍കുന്നു. നിലവിലെ പ്രതിഭാസം മല്‍സ്യങ്ങളുടെയോ മരണനിരക്ക്‌ റിപ്പോര്‍ട്ട്‌ ചെയ്യുന്നില്ലെങ്കിലും, ആവര്‍ത്തിച്ചുള്ള ആല്‍ഗല്‍ ബ്ലൂമുകള്‍ ജലത്തിന്റെ ഗുണനിലവാരത്തില്‍ മാറ്റം വരുത്തുകയും പാരിസ്‌ഥിതിക പ്രത്യാഘാതങ്ങള്‍ക്ക്‌ കാരണമാവുകയും ചെയ്യും. പാരിസ്‌ഥിതിക പ്രത്യാഘാതങ്ങള്‍ വിലയിരുത്തുന്നതിനായി വകുപ്പ്‌ നിലവിലെ പ്രതിഭാസം നിരീക്ഷിച്ചുകൊണ്ടിരിക്കുകയാണ്‌.
